وأتذكرك/بقلم الشاعرة/نجلاء علي حسن.
« وأتذكرك»..
في يوم ميلادي وأحنّ لك،
وأحنّ لأجمل حلم يوم عشته أنا،
ولحب دَوَّقني السعادة والهنا..
يا عشرة العمر الجميل،
يا روح وهايمة في السما..
يا حلم ليله مش طويل،
يا نصيب وقسمة مقسمة.
أنا ويا طيفك كل ليل،
بعيش حياتي مجسّمة،
وعشان كدا..
وياه بميلادي بحتفل،
وأرقص معاه وأنا ببتسم..
ومحضرة..
شمعة ووردة ويا قهوة،
عليها وشك يترسم..
تورتاية بيضا،
ويا فيروز تتقسم،
هي رفيقة دربنا..
وكل ما أسمعها تغني، أبتسم..
ويمر طيفك في خيالي،
يغني وياها يدندن:
"شو كانت حلوة الليالي"
دموعي تسبق بسمتي،
على اللي فارق دنيتي..
وسابني أنا متألمة،
وإن عشت على ذكراك سنين،
راضية ومش متندمة.
يا حب عاشني وعشت فيه،
يا أحن قلب اشتقت ليه..
عمري أنا.. هو السنين
اللي قضيتها بين إيديه،
ونبض قلبي فيها حنّ،
لكل نظرة من عينيه.
الشوق بيغلي في مهجتي،
عايزة أفارق دنيتي..
وأروح أنا وروحي إليه،
ونعيش سوا..
حتى في موتنا نعيش سوا..
وأجمل هوى.. في السما هنكمله،
دنيا وآخرة مستحيل راح نهمله.
وفي يوم ميلادي..
بفتكر لك ذكريات أول لقا،
وفرحتي ما كانتش بيك متصدقة..
الوقت ليه عدا وفات؟
وساب ما بيننا ذكريات؟
ونبض حب جميل ما مات؟
وإن طال بنا ليل الآهات..
هفضل تملي أعشقك،
تاني من جديد..
ونكمل الحلم السعيد،
يا نبض قلبي والوريد..
ده يقين ومش مستسلمة،
لحد ما نكمل هوانا في السما.
بقلم: نجلاء علي حسن
الفراشة الزرقاء🦋
تعليقات
إرسال تعليق