تسوى ايه/بقلم الشاعر/مصطفى كرم.
*** تسوى ايه ***
تسوى ايه
لما تلاقي زرع عمرك
بعد الضنا مال وخاب
لما تشوف نبع حنانك
ينكروه ويبقى عذاب
لما تلاقي حلم عمرك
وهم كله طلع كداب
والأمل اللي بنيته
بعد فوقة بان سراب
تسوى ايه
لما تحس وسط ناسك
يتم حقيقي واغتراب
وجزاء الحب ليهم
تحصده جرح وعذاب
يقفلوا ف وشك مودة
وانت فاتح ألف باب
يسلخوك زي الدبيحة
وملكش حق ف العتاب
تسوى ايه
لما تشوفها خرم إبرة
والأمل كاسيه ضباب
والندى اللي بل ريقك
يبقى علقم طعمه طاب
وصبح رفيق حياتك
صابغ يومك بالهباب
أصل الجرح تملي واعر
لما ييجي م الأحباب
واللي فاكره يبقى سندك
قلبه ماكر كالذئاب
يبقى باقي فيها إيه
واللا عايش فيها ليه
وانت مبتور من جذورك
كل ريح تيجي بترميه
خطي فوق الصعب دربك
وافتح النسيان لكربك
واعتبر شريط حياتك
مسخ مدفون جوه قبرك
**************************
بقلم / مصطفى كرم
تعليقات
إرسال تعليق